مصر التي في خاطري و في دمي

أحبها من كل روحي و دمي..................


ساعات يعني مش دايماً:)


بس في معظم الأحيان و الله


إذ لن أنسى عندما سافرت خارج المعمورة أد إيه كنت بتقطع، و مع إني كنت في دولة حلوة قوي، شوارعها نظيفة قوي، بيوتها كأنها مرسومة إذ لا عشوائية فيها، إلا إن الطائرة -في رحلة الإياب- أول ما دخلت المجال الجوي المصري و نظرت من شباك الطائرة و شفت بيوت المصريين من فوق أد إيه مرسومة برده بس بسريالية، حسيت وقتها بإحساس واحد: بحبك بكل ما فيكي من عيوب و مصممة أغير فيكي كل حاجة عفا عليها الزمن.



لكن بصراحة مش هو ده اللي أنا جاية أقوله لكم،

أنا هاحكيلكم عن مصر التي في خاطري و في دمي، هرسملكم الرسمة اللي في خيالي ليها، ممكن تلاقوا خطوط من الرسمة دي تتلاقى مع خطوط حقيقية في واقع البيئة المصرية، لكن هذا لا يمنع إن فيه خطوط كثيرة ممكن تكون من نسج الخيال.



لكن تحذير لكل من سيكمل الموضوع:

يا جماعة

أنا مخبية عليكم حاجة



























أنا ما بعرفش أرسم:)

لكن أكيد رسمتي مش هتطلع أكثر سريالية من الواقع.













غمض عينك معايا كده و احلم



مصر التي في خاطري:



*هتصحى من بدري مش من الساعة 12، و هتصحي أهلها لما يلاقوا هواها النقي بيداعب عينيهم، مش عاوزة أقول إني أتمنى كمان أنه يداعب رجليهم فيقوموا كلهم يا إما يجروا في شوارعها و حولين جناينها يا إما يلعبوا رياضة.

غريبة ما شفتش حد سأل جناين إيه؟ هي مصر فيها جناين؟ و بالتالي:



*عايزينها تبقى خضرة، مليانة جناين، مش إشكال لو كانت مليانة عشوائيات تؤذي العين، الجناين هتقوم بالواجب ده و تريح عنينا.

*و بعد ما فطر أهلها، قال كل واحد منهم: النهاردة أنا هسيب العربية بتاعتي في الجراج، أصل المواصلة هتقوم بنفس الواجب: مريحة، سريعة، و رخيصة، و بتعدي بانتظام، كل ربع ساعة أتوبيس (792) بيعدي -معلش أصل الأتوبيس ده بالذات عامل لي عقدة نفسية و عصبية- و أهو الواحد يضمن أنه هيوصل في ميعاده مظبوط.

*و فعلا ركبوا المواصلة، بس عارفين لما أستاذ محمد ركب الميكروباص المرة دي إيه اللي حصل؟؟؟، شئ غريب و الله، مش هتصدقوه، الأسطى نادى يللا كده يا جماعة ابعتوا مع بعض، و هنا قال محمد لـ لارا اللي قاعدة جنبه: حضرتك هاتي الجنيه أنا اللي هاجمع الفلوس......-طبعا لارا أغمى عليها من الفرحة:)
*و لما لارا فاقت و حبت تدفع الجنيه، اكتشفت إنها نسيت المحفظة في البيت، لكن الأسطى ربنا يكرمه ماخلهاش تشعر بالاحراج، قالها و لا يهمك يا آنسة، المهم توصلي الجامعة بالسلامة و تذاكري كويس و تتفوقي و تفيدي البلد، ثم التفت إليها بعينيه الدامعتين قائلاً: مصر محتاجاكي يا لارا.


*يا جماعة الدنيا اتغيرت مصر عادت كسابق عهدها: تقدس العلم بأنواعه طالما كان نافعاً، و الدليل إن لارا لما وصلت لكليتها (علوم) وجدت المعامل مفتوحة لو حبت تشتغل فيها قبل ماتدخل المحاضرة، كل الناس عارفة كويس إن اللي هيقدم براءة اختراع السنة دي هيبقى ليه بوناس. و ليه لأ؟ أصل الدولة موفرة كل عوامل الراحة للطلبة -دي أعلى ميزانية مرصودة للتعليم.

*أما محمد وصل قبل ميعاده بعشر دقايق، على طول راح قعد على الكمبيوتر بتاعه علشان يشتغل، لالالالا فهمتو غلط، هو مش مبرمج و لا كيو ايه ده مش بتاع كلام علم رياضة ده خالص، هو بس بيتابع آخر ما توصل إليه العلم في مجاله، و لو مش هيقراه بيطبعه على البرينتر أصلها فيها حبر لأن الناس في الشغل عندهم ذمم و مش بيأكلوا ولادهم سحت فبالتالي مش بيطبعوا عليها حاجة تانية غير الشغل.

*محمد و هو راجع قال لما يعدي يجيب عيش، بنفسه و الله مش هيبعت البواب، أصل الموضوع مش هيعطله عن أي حاجة، راح قال للراجل ب 2 جنيه لو سمحت، قال له انت هتجيب لنفسك و للعمارة؟؟، و اداله 40رغيف، -محمد ضحك في سره و قال هو عرف منين إن النهاردة فعلاً دوري في خدمة العمارة، أصل الجيران تعرف بعضها بالاسم و كل يوم واحدة من ساكنيها تلم العيال و تواديهم المدرسة - اللي جنب البيت، أصلهم مش محتاجين يروحوا التجمع علشان يودوا عيالهم مدرسة حلوة و لا طريق مصر الإسماعيلية و لا 6 أكتوبر كمان- و بالمقابل واحد من الرجالة يجيب العيش للعمارة -معلومة : الرغيف ب شلن بس حجمه زي اللي دلوقتي بتجيبه بنص جنيه، أصل تاني حاجة الميزانية بتترصد لها بعد التعليم هي القمح.



(يتبع)...إن شاء الله